陰雨不定
21號，陰雨不定。
9點鐘左右上車，換完手機卡後就打給RCVO配音組的紫丞少主和百劫星羅，他們都很好地接了電話 XD
去到廣州，老豆提議去詩書路，搭車去到西門口，唔識路，行左半個幾鐘，去到「阿蘇」推介的一間食肆，認真麻麻，跟住去左西華路 (?) 果頭有間甜品鋪，都幾好既，D杏仁奶糊幾濃，帶出奶味，正！
配音班底
食完呢間之後就去搵少主佢地勒，佢地係華農果邊，即係去五山。
咁就要轉車啦，係三號線天河方向月台果度，問下人去五山會幾耐，佢地就話三個字到。
沿途都有同佢地傾下咁既，佢地去到崗頂就落左車。
到站了，結果係落雨，過左對面OK一陣，買左支我最鍾意既麒麟牌魔力氨基酸飲料，先3.6，香港邊度搵啊？
無耐，星羅出黎接我，嘩，變態，等等，我唔係話星羅，我係指華農個校區，大到無朋友。
行啊行，行過個湖仔，碌下碌下碌左去西湖，上左學校車，1雞PER人頭。
喺打呢篇野既時候，星羅補充句話，我未行晒就已經話大。
正所謂︰事不關己，霑霑自喜，我呢個香港人就好唔想行路，除非話環境夠Pleasant，唔係既，我唔係嫌棄佢地D地方，而係佢地D地真係凹凸到我都唔記得點打凹凸呢兩個字。
圖︰少主，我，星羅合影。
我鍾意探索，但我唔鍾意無止境咁探索，太攰，體力太透支。CALL左小紗好多次都冇人聽，唯有打msg。
返沙面，去了附近一間嚼江南吃晚飯，嘩，好多味精，唔落味精件事都冇咁worse。
唔想講咁多。
返酒店之前去左人民橋影相。原諒呢部係攝錄機唔係相機 (相機友︰好心你就用相機影啦)
带你四处转一转
越秀海珠东山北京路谈情 听听远处那鼓声 谁又抗拒染上龙舟的喜庆 回望岸上灯火照映繁华 盛世让我深深庆幸逢生此际
22號，陰晴不定。
大同茶樓飲茶
人家常說，近年來廣州的茶樓點心質素每況愈下。大同茶樓至少推翻左呢個講法。
唔少點心都好正，廣州同香港喺點心上可以話不相伯仲。
但至於去茶樓，粵語說，當然是「飲茶」啦。
點了「台灣人參烏龍」，第一趟茶 (唔係第一趟車啊) 無乜味，跟住之後脷尖嗒住杯茶，一陣回甘的味道喺味蕾上蕩漾住，發出淡然既香，幽思無限，打返開雙眼，呢度係茶樓。
撞完慌
跟住去左位於人民南路附近既狀元坊。除左地下污糟啲，同旺角無乜分別。
「戰利品」有一件T恤「不自由毋寧死」，喺大陸購買，猶覺諷刺。
一個大舊HEADPHONE連一個通話咪筒，一個筆袋同埋2 對袜。
返東站，大概係2點既事。
往深圳列車即將開出
不知道為何列車廣播總要女聲。
唏噓住呢個我黎左三次既城市，由最初無朋友變到上埋人地大學宿舍。
畀我既印象係市容真係唔舒服。
我老頭講左句，「唔好用香港既標準黎比較」。
好矛盾。
我唔想用香港既標準既，某程度上咁講。
市政相關部門經常掘路，地下唔算多垃圾，但凹凸不平程度係我去過咁多城市最嚴重既一個。
廣州人係可愛既，但係開講有話「相見好同住難」，人是城亦是。
對政府唔可以有啲咩信心。你被人搶左野，你嗌啦，本地街坊或者會幫，但如果對方係湖南人，咁…
呢個時候我想講一句︰「高樓大廈可以抄，地鐵系統可以抄，品牌產品可以抄，但唔好意思，人民素質係冇得抄。」
你話我歧視我都係咁話。我會將廣州人分做兩類︰識廣州話，唔識。
識既大部分都易話圍，肯守規矩，教養都唔會話太差。
唔識既唔少都粗聲粗氣，大聲到喺番禺都聽到你喺天河講乜。唔識守紀律。
當然唔可以一概而論，一竹篙打一船人。
但點解巴黎鐵塔下低個廁所用簡體字寫告示呢？心照。
如果畀我從政我唔會留喺香港。香港起碼路唔會一忽高一忽低，起BRT起到勞民傷財，通完車司機大佬仲有呻。改善下路政建設，增加路面的士數量，多快好省咁起多幾條地鐵線。人民南嗰頭係完全搭唔到地鐵，我地唔係本地人唔識搵邊條公交車。官員唔該以人為本唔好以民為本，講左好多次，你代入下自己係普通人，出行都有困難，公交車逼過沙甸魚盒，出多幾趟車會死咩？
堂堂廣州城，市政建設可以改善既地方仲有咁多。唔好話我大香港主義發作，返返去頭先嗰句，如果揸正黎睇，我覺得令我滿意既地方似乎真係數唔出幾多。
環衛工人定時洗下地，唔好積晒塵都唔洗，呢鑊真係「唔洗客氣」。
針對權責不清既問題，我認為廣州市政府應該重新整理各部門︰
廢話唔想多講。
唔鍾意大陸幾樣野
踎廁
我自己覺得係好唔衛生，當然會有人反駁我話坐廁塊板個個坐過晒仲唔衛生，我心諗你會抹架嘛，同埋用踎廁係好唔照顧女性既行為，搞到女仔好粗魯。如此一來，實現左「靚女唔柯屎」既長遠目標 ( XD )。對於著裙、高跟鞋既女士，係冇可能用到踎廁。加上，用踎廁太耐雙腳係會好痺，而且所有踎廁都係好臭！(我認我係好奄尖)
夏天風吹，一陣徐徐既「幽香」悄然沁人心脾，米田共味「飄香」，「我接受唔到囉」。(顯然是受了無記文化的影響)
無空調和媽叉的城市規劃
廣州熱到媽叉咁，冷氣又唔見佢開大喎。深圳涼過佢冷氣都大D，顧下人啦，身水身汗仲要逼喺你個屈側車廂，好難頂架！係得酒店D冷氣叫正常少少囉，好冇！D地鐵口又唔得光明正大，屈喺個商場啦，巷仔都有，發仔記你做乜野架？口胡！！
面子工程 (又叫穿衣戴帽工程)
度度都係棚，度度都係工程，度度都有人。
處處搵人問路都係答唔到，問幾個先有個知道，有D連詩書路喺邊都唔知。
有幾個外省人問我地佬，我心諗我孭咁大個包，唔似本地人囉。
講廣州話 =/= 係廣州人。
唔禁煙 / 講一套做一套
22號去大同酒家飲茶，野食廉宜又好食，可惜附近有好多煙鏟，仆街你話，搞到冇晒mood，一邊食野邊食二手煙，好難頂。好憎人食煙，又或者至少，好憎人喺我面前食煙。食煙既名人係我心目中印象會差，或者因為工作需要食，或者因為減壓，或者係成班老友都食逼住食，憎！入骨既憎。靚女無論你有幾靚，幾有涵養，至少見到食煙既，對唔住，唔該你自投珠江。
好憎呢個社會做人有時需要假面具。好憎講一套做一套。好憎人唔守諾言，至少你唔ok既同人單聲好等人有個心理準備。
好憎人唔聽電話，好憎人用D嘈到拆天既電話 (接駁) 鈴聲 (放心，唔係話你啊星羅)。好憎大陸又封鎖網絡，境外上到既網，入到去就上唔到。你要block咪block啲敏感野囉，一概封晒係唔可行。
網絡步向自由，共和國政府害怕人民造反，咁咪封鎖囉。箝制你既思想 (至少有人有獨立思考能力，我好慶幸) 之後就黨前黨後。反貪倡廉咩？慳啲啦！算鳩數罷啦！
再打唔駛瞓，今日筆耕此處作罷。
沒有留言:
發佈留言