有啲粵語啲嘅粵語

(By André Karwath via Wikipedia)

左膠最鍾意講嗰句就係「沒有誰比誰高尚」，今篇唔講政治，講下粵語。當然啦，講到最詳細嘅都係去返粵典啦！家陣我地個個都咬牙切齒咁話梗係撐粵教中啦，仲撐埋粵教冚辦爛科。普通話唔係我地嘅語言。啱啊，好同意啊我，但撐還撐，唔好令粵語淪為書面語嘅一種簡單載體，粵語本身有好多好「本土」嘅講法。我唔知你地屋企老豆老母鄉下邊度，我老母就香港出世，祖籍番禺嘅，所以keep到唔少講法。當然你本身係客、潮、閩、吳嘅，無得好講。

自從香港開始發展經濟，到今時今日互聯網發達到極點，肯動身去郊外玩嘅人就變得唔多（或者話懶咗）。「喂大佬唔使搵食咩！搵完咪喺屋企攤屍囉」相信係唔少人嘅諗法，呢啲人當中又有啲做咗人老豆老母。由於佢地對大自然認識只係停留喺最簡單嗰幾款，所以佢地唔識教小朋友舊式嘅粵語。之但係咁啵，喺自然界嘅粵語係有唔少嘅。粵語唔係淨係齋讀書面語「蜻蜓」或者「蚯蚓」一種講法，唔好就咁當咗佢係粵語。（你又可以拗嘅，語言係跟時間轉變，無謂泥古吖！所謂何文匯嗰挺象牙塔「正音」就係泥古泥到不堪。呢啲講法係粵語啲，或者話係粵語過喺香港講嘅粵語［即係粵海片香港方言點，唔講喇］）

我覺得當中嘅講法，有啲正路啲，例如︰「蜻蜓」實情係塘屘，「蚯蚓」就係蜿蟺（讀若黃犬）；亦有啲係古怪啲，例如「蝴蝶」就叫崩沙（你大概只會諗起順德出嗰啲油淋淋食物，係啊，嗰啲係按蝴蝶形嚟黎整嘅）。普通話嘅水蛭（吸血蟲）視乎你係粵語邊度鄉下，可以講蟥蜞（waang4 kei2）同埋蜞乸（ke4 laa2）。有啲講法就失傳晒咁滯，例如蟹就無人再叫「蟛蜞」；蜈蚣亦都取代咗百足，只係剩返「百足咁多爪」呢句說話；大概係我地唔會點叫到我地個肺前面嗰排骨，所以肋骨／排骨又取代左骿骨（peng1）。因為叫公乸方便，所以亦無咩人再講雞hong2（有人寫做「未成母」，左未右上成右下母［亦有可能係因為無字記錄］，意即未生蛋嘅雞乸）。

如果你係父母嘅，不妨講多啲畀佢地，下次有機會同小朋友去郊外，可以同佢研究下昆蟲，同埋唔使再放「風箏」，可以放紙鷂。如果你係學生或者做緊野，喺你生活中都可以試下用一啲舊式啲嘅用字。粵語嘅語音唔係書面中文嘅載體，粵語自己都有啲特定嘅講法㗎。真係有興趣嘅，搵一啲社會語言學嘅書，除咗下面Bauer教授啲參考書之外，仲有Janet Holmes都有本Introduction to Sociolinguistics，你會睇到好多好好嘅例子，對世界嘅語言情況有更多嘅了解。：）

延伸閱讀︰由此路進；社會語言學教授包睿舜的Lecture notes。