「你好，我係懷舊青年。」

「你好，我係懷舊青年。」

(by Hvicentiu via devianart)

大概由八九十年代開始，香港嘅青少年已經懶得睇書，或者話直接跳過咗睇書嘅過程，一下跳咗入打機、睇電視、聽大一大聲嘅搖滾音樂。被填鴨式嘅教育制度壓逼到不似人形，唔少後生仔選擇打機，唔使點用腦咁放鬆下，而相對嚟講，睇書嘅人就少咗好多喇。亦因為咁，香港嘅後生仔整體嚟講嘅質素就唔及得舊陣時。當然，我唔係一竹篙打一船人，你見輔仁、熱血時報有咁多犀飛利嘅年輕寫手，就知道我地呢脫人都仲有啲識諗野嘅人嘅。

由於香港嘅青少年睇少咗書，學校嘅中文教育亦唔鼓勵有啲咩大幅度嘅創作，於是乎連同識字、惜字嘅人都少咗。唔理係寫舊體詩詞、新詩、散文還是小說，鍾意寫嘢嘅人都少咗好多。寫中文嘢？唔會有人睬你㗎喇，呢撻咁市儈嘅地方。間中可能仲會有關夢南先生呢類好關心青年寫作嘅前輩，但我相信喺香港地要維持呢個嗜好或者信念，真係蝕水。舊陣時《華僑日報》一類正統報章，甚至會有讀者投稿園地，有地方畀文學方面嘅讀者投稿（如果我無記錯）。不過由於錢作怪，呢啲園地買少見少，就如同領匯排擠小商戶咁。如是者，最後都係專欄作家嘅天地。

細佬我細個嗰陣啲字係好肉酸，高小初中嗰陣有啲習字簿，啲先生唔係乙－就係丙＋。就算係寫書法，佢都要你寫正楷，任何偏離所謂正統嘅嘢都唔會攞到高分，呢個咪就係香港嘅教育制度囉。到近年，啲老母鍾意將細路哥啲時間表塞到實一實，驚死個仔個女會去偷食咁，當中有啲家長就會送仔女去書法班。啲字係工整，正楷，咁但係除此之外就乜都唔識。邊個係懷素、米芾、歐陽詢、宋徽宗、趙孟頫都唔知，然後就好叻叻咁拎張暑期書法班證書去媽咪度，換來一句「Oh sweetie you're awesome」。嘔啊。我屋企人見我寫硬筆字（係，我細個連硬筆字都肉酸），就係咁提我要寫字寫靚啲。其實齋勸都無咩用，要有實際例子先夠說服力，呢，就我老豆，佢啲字真係好肉酸，咁就成為咗一個幾大嘅動力，令細佬我喺FB都呃到吓like。數碼年代，打字、打E-mail已經成為主流，所以舊陣時嘅人寫信，收到隻隻字跡封封信，都會好好搵個盒收藏好，因為呢啲係scan咗入電腦都搵唔返嘅回憶同味道。

更加少後生仔會留意留心嘅，係五六十年代嘅香港（文化／電影／歌曲）。陳錦鴻我諗有啲讀者都會識，我相信TVB請佢其中一個原因，係因為佢生得有啲似張瑛，成日為人師表嗰個。鄭君綿、林鳳、蕭芳芳、紫羅蓮……當年一連串嘅明星名，做啲戲雖然今日睇返都幾無聊，啲笑話又幾爛（好似呢個），不過亦都有一啲教人勵志、導人向善嘅電影，《恩義難忘》嗰啲，又有吳楚帆話「人人為我，我為人人」，又或者係一啲社會悲涼慘況（《可憐天下父母心》嗰啲）。好一個社會嘅寫照。今時今日，固然細佬我都鍾意睇大波妹或者睇有粗口嘅片，但係相比起呢啲有教育意義嘅戲，睇完你就更加學到一啲家陣電影未必畀到你嘅嘢。而且仲真係教到啲實牙實齒嘅嘢，唔記得係張活游定邊個，總之佢對住個女仔喺度吟詩，唔講由自可，原來係李商隱嘅《無題》︰

相見時難別亦難，東風無力百花殘。 春蠶到死絲方盡，蠟炬成灰淚始乾。 曉鏡但愁雲鬢改，夜吟應覺月光寒。 蓬山此去無多路，青鳥殷勤為探看。

嘩，不得了。當時畢竟出嚟做編劇，肚入面都要起碼有返幾滴墨水卦。家陣都有，不過呈現嘅方式好多時受西方電影價值觀左右，反而可能無咁真。粵語片之餘，當時仲有陸運濤嘅電懋公司，拍國語片，基本上係上海片嘅延續，少睇，唔講喇。原來香港當年除咗粵語片同國語片之外，仲有潮語片同廈語片。舊年十月，香港電影資料館舉辦《潮聲逐夢去》系列電影放映會，播放咗《剪月蓉》等多套電影，放映會現場觀眾大多都係講潮州話，我呢個香港人就格格不入喇。不過有唔少珍貴電影，確實係被唔少人遺忘同忽略咗嘅。舊陣時識英文嘅人唔多，睇英文戲嘅熱潮我諗要到後啲先開始喇。而家選擇多咗咯，仲邊鬼度有人肯好似我咁睇埋呢啲舊唻柴嘢呢？
（離題：當年電影嘅片頭熒幕美術蓋字，設計嘅人一樣有返咁上下水準，反而家陣冚辦爛靠電腦，味道未必咁出）

至於歌喇喎，有好多歌都係國語民歌、流行曲或者英文歌改編而嚟嘅。鄭君綿有唔少歌都係咁嚟㗎，《康定情歌》《桂河橋》呢兩個名你唔熟的話，鄭君綿同鄭碧影隻《才子佳人》句「擰柳腰好似蘇菲亞羅蘭，又似惹火寶烈吉妲，佛見到都會起大痰，花ｏ靚仔想到心爛」應該會令你有返啲印象。當然仲有唔少係民國二三十年代上海國語時代曲嘅歌手嘅歌改編，就好似有龔秋霞、周璇呢啲。呢，鄭君綿就有一隻《貓聲貓氣》，就係龔秋霞《木偶寄情》改編嘅；至於《Sealed with a kiss》就無厘頭咁變咗《煲燶粥》，甚至《Que Sera Sera》變咗講父女孝順做主題。粵語流行曲改編之後同原本隻歌無咩啦楞，都係幾常見嘅。

講到詩詞文學，陶傑就別有一番體會。佢咁講︰

美國人發明的高科技，你當然可以移植過來，抄襲盜版，亦無不可，但清朝的張之洞還強調：「中學為體，西學為用」，手機和WhatsApp是西學，中國人文精神裏的簡潔與禮貌，是中學。現在用WhatsApp，以大陸九十後的白話文：「剛來找過你，你不在」，或「剛找過你，沒人」，連「中學為體」也丟掉。
WhatsApp通訊，先沒有了端莊和禮貌，然後用一張張臉孔表情的符號來代替文字的心情。「悵甚」的意思，可以用帶一滴淚水的一張臉表達，如果這樣，不如全球新人類一起學古埃及的象形文字更方便。
很明顯，手機的盛行，先導致「失字」。語言和文字是孿生的一對。「失字」之後，必然「失語」，講話斷成一小截一小截，不可連貫。用多了手機，可以刪除文字，也就是Delete，加上不喜歡讀歷史，又多了「失憶」。失字、失語、失憶的總和，必然變成「失智」。什麼是「失智」呢？也就是大陸人說的「腦殘」。
大陸或許流行「腦殘」，但香港也湧現失智的一代。他們厭惡閱讀，抗拒思考，覺得好悶，或者「很累」，他們專注力很弱，排斥二百以上的文字。在網絡的論壇，無論罵人或稱讚，他們用的文字越來越少，最後不是一隻大拇指向上的符號，就是一張怒目的臉。未來的一代領袖，也只靠Sound-bite和一張臉孔上位。不論喜歡與否，這個世界在「進步」，不過，離發射核彈如玩On-line遊戲，將十億人Delete掉，如同刪除記憶，世界Game Over的一天也快了。 

當一個二個都踏入WhatsApp時代，確實寫、賞、研、讀詩詞係無咁嘅必要，現代人好忙，呢分鐘check完facebook notifications下一分鐘又睇微博、微訊朋友圈、Instagram，總之訊息氾濫，人已經消化唔晒，處理唔晒。面對住大批大批嘅資訊，大批大批嘅書/文章，無可能睇得晒，呢個時候就有選擇，你選擇睇金庸易舒衛斯理、詩書易禮春秋，係古德明陶傑，定係朱薰蔣薇？

近年大陸鍾意將青年分類為三類︰普通青年、文藝青年、2B青年（意即傻子）。話自己係文藝青年嗰啲，固然可以話全盤西化，都係睇西方書籍，馬克思又好、馬奎斯、波爾赫斯都好，你有你嘅文藝方式，無問題。但我諗仲可以加多種，叫懷舊青年。呷一杯碧螺春，讀一本《笑林廣記》又或《聊齋誌異》，喺歡笑或者嘆息聲中，度過一段段時光。