2014年5月7日

愛香港,用唔用得中國貨?

愛香港,用唔用得中國貨?

(筆者的一些中國品牌貨品)

是咁的,我都係標題黨(笑)。雖然寫得呢篇文預咗比人小同埋會無咁啲朋友。啊同埋,我無收任何廣告費,純粹有感而發,利申咗先。

我覺得有好嘅中國牌子係唔怕用嘅,視乎你識唔識得揀,同埋well,對中國貨嘅信心。當然你可能會話,中國貨會爆炸架喎。咁你揀啲黎用囉,chiu…實情係,揀一啲信得過嘅中國牌子就可以囉。堅持唔用中國貨嘅朋友,我好尊重你嘅選擇,但亦希望你尊重我嘅選擇。買中國貨係唔等於投共嘅。

先講啲最簡單嘅先。其實最簡單一樣野,就係中國牌子點解今日個朵臭成咁?就係有好多害群之馬害到成個品牌壞晒。識得我或者睇開我啲文嘅朋友都知我幾鍾意上海,我覺得佢係全中國算係少數喺我睇黎叫幾正常嘅城市。上海開埠時間同香港大致相若,之後陸續開始咗一啲中國本地品牌,有啲係用黎抗衡西方嘅洋牌子壟斷市場嘅。但點都好,價廉物美成為咗上海起家牌子嘅一大特色,有相當數量嘅牌子喺1949年之後仲有得繼續經營,都算係咁。老老實實,我諗唔止上海人,大部分嘅人都唔鍾意自己、以至自己個城市柒。如果整咗堆柒嘅產品出黎,揚開去你成個地區都柒埋一份。蒙牛就係好例子。基本上中國嘅牌子我會分為廣東牌子、上海牌子同埋其他牌子,廣東同上海嘅都有返咁上下,同外面接觸得多,柒左全世界都知,其他山旮旯嘅,外國人鬼識咩。

先講鋼筆墨水。鋼筆我自己用開嘅係中滬牌,當然英雄牌就更多人識。而家香港嘅教育、學習生活入面基本上用唔著鋼筆,我地一跳就由鉛筆(實情係鉛芯筆)跳過原子筆/墨水筆,唔使用鋼筆。同原子筆鋼筆係要人手入墨水,就有個墨水甕,隊枝筆落去,撳枝筆上面個泵泵啲墨水上枝筆管度,咁就搞掂嘞。上圖可見,我係用上海牌碳素墨水214型,60毫升嘅。透過寫鋼筆字,可以訓練一個人寫字嘅書寫力度,落筆嘅筆劃筆順,從而培養對漢字嘅喜愛。不過香港嘅細蚊仔忙到踢晒腳,一陣要學英法日西文加普通話,一陣又話要圍棋珠心算畫畫跆拳道,都無咩時間睇書,更唔好話寫漢字同培養對漢字嘅重視同喜愛漢字啦,下話?雖然咁講好似有啲自誇同串嘴,但竊以為香港有唔少人寫字寫得普普通通,有部分原因係因為無經歷過鋼筆做轉折嘅時期,結果原子筆無嗰種力度喺入面,就容易寫得普通嘞。唔啱嘅歡迎你回我啊。

跟住講家居用品。香港舊陣時就有按兩條麻甩佬畫成商標嘅雙妹嘜花露水,上海呢就有六神,之後遍佈全中國,好多度都有得賣嚕。花露水呢挺野聽喺黎雖然好老套,但就可以保持屋企有種舒服嘅香味,而且有啲特別裝嘅,例如上圖嘅止痕花露水,加入一啲中藥成份,例如防風、黃芩、白蘚皮,可以用黎搽蚊眼(laan3)同埋冬天手痕R自己,R到紅或者損,都可以搽佢,好快可以搞返掂,香香地仲好冰涼,好鬼舒服架。佢仲有出番梘,不過無用過(番梘另外有美加淨,但未用過)。另外外國有花士令(Vaseline,凡士林呢個名都係上海話譯出黎嘅),上海就有百雀羚,都係啲香香地嘅滋潤護膚脂咁,又平一撅(當然上述你驚皮膚敏感嘅咪唔好用囉)。另外仲有白貓洗潔精,個公仔好得意,又係好平一大枝,有好多味可以揀。

接住落黎到食物。添加劑,坑渠油,係有架,都係嗰句,睇下你信唔信囉。上海方面有隻糖好鬼正,叫桉葉糖,個樣係咁嘅。
個味道其實同薄荷味利口樂無咩分別,但實在平得好交關(啊係啊,交關呢個字都係上海話有用嘅,不過上海話會講「交關便宜」)。廣東牌子方面,喺廣州食雪糕通常會買五羊,外國牌子有啲啲味OK,但貴;另外華南農業大學(真係華農LOL)會出酸奶(即係Yoghurt,乳酪、優酪乳,你想點叫點叫),都係兩三蚊一包,好似錫紙裝利賓納嗰啲size。大家細個食開,有張米紙包住嘅大白兔奶糖就係上海冠生園公司出品,二三十年代已經開始有呢隻牌子,初時係做蜜糖之類嘅,後來有啲糖啊口立濕都做埋咁。喺上海一帶都流行一種叫薺菜嘅蔬菜,味道清淡,通常用黎做肉包配料同水餃餛飩之類嘅餡,肉包上海差唔多公價個半銀錢,菜/無肉嘅就個二銀錢,豆漿就個半銀錢,食早餐真係幾平,當然你覺得啲肉係死豬肉啲麵粉係有問題,大可以去食貴野,我窮我衰嘛。

講完食講飲。飲方面有款嘢玩香港無嘅,叫鹽汽水,所以中劇《愛情公寓》就經常有句對白話「我一口鹽汽水噴死你」,因為套嘢上海拍嘅。Carbonated water,少少咸,少少甜,有啲檸檬味,飲完好ger嘅。由於製作成本唔貴,所以賣得仲平過汽水,有興趣不妨下次去買枝試下。想要文人風雅啲嘅,自不然就飲茶。茶道嘅複雜而微妙,需要用時間慢慢揣摩,啱紅茶嘅有安徽祁門、雲南滇紅、廣東英德;青茶又有武夷山大紅袍、烏龍、鐵觀音;我就最近飲開黑茶,最出名有普洱,我飲緊嘅係六安,當中又有分香六安同六安骨。不過喺買茶之前,首先確保你對茶有返咁上下認識,唔係畀人搵老襯又返黎搵我算帳,我唔擔保架。

最後想講下藥喇。講起中國製嘅醫藥產品呢,唔係淨係得三鞭酒嘅。西瓜霜同金嗓子喉糖都好幫得手,當然效力無使立消咁啃(keng3)。眼藥水出奇地平,不過你覺得眼睛係靈魂之窗寧願買貴啲嘅都得。另外有一隻不得不介紹,喺香港肚屙、攪腸痧你可能會食李萬山或者濟丸(正露丸好貴啊我買唔起),如果咁唔好彩你去到中國大陸食晒,或者直頭無帶,你應該買定咩傍身呢?就係藿香正氣水。根據李時珍《本草綱目》嘅記載(大佬你唔信我你信佢吖)︰
藿香主治風水毒腫,去惡氣,止霍亂心腹痛(《別錄》)。脾胃吐逆為要藥(蘇頌)。助胃氣,開胃口,進飲食(元素)。溫中快氣,肺虛有寒,上焦壅熱,飲酒口臭,煎湯漱口(好古)。
好使好用,藿香正氣水係口服液,多數一買都係十枝,一枝五毫升左右,都係10蚊雞左右,止肚痛好快見效。

最後一句啦,你愛唔愛中國係一件事,買中國貨同愛中國,在我呢個香港人黎講係無必然關係嘅。以上嘅牌子都係只供參考,我鍾意買,我買開唧。你抗拒中國牌子嘅,無問題㗎。

沒有留言: